حلوه الثوره

حلو يا مجلس يا مظبطنا
ياللي  ببيانات بتحكمنا
وسايب الداخليه تضربنا
حلوه الثوره...حلوه الثوره
حلوه الثوره اللي بتسرقها
حلو الاستفاء الشفاف
اللي خلنا من بعض نخاف
وبعد ما كنا ايد واحده
شتتنا خلتنا اطياف
حلوه الثوره... حلوه الثوره
حلوه محاكمات الثوار
حلو الحكم بسيف بتار
اللي يوافقك حلو وشاطر
واللي يعارضك كافر وحمار
حلوه الثوره ...حلوه الثوره
حلو القبض علي العمال
طول عمره شيال احمال
لو ضايقك وعمل اضراب
احكم عليه  بالاشغال
حلوه الثوره ...حلوه الثوره
حلوه الصفقات المخفيه
اللي مع تيارات سياسيه
تسمعوا الكلام يا حبايبي
تبقوا في المجلس اغلبيه
حلوه الثوره ...حلوه الثوره
حلو مبارك في المستشفي
بيتعالج بالاف في اليوم
ومصابين الثوره بالكوم
مشلاقين حتي يتعالجوا
حلوه الثوره ..حلوه الثوره
حلو دم الشهدا بيتهان
والسفاح عايش في امان
بلا محاكمه بلا سخام
حلوه يا ثوره البتنجان
حلوه الثوره ..حلوه الثوره
اصحي يا شعب يا خرم النوم
فساد مجلس طنطاوي بالكوم
شكلنا كده بنحب العسكر
شكلنا بنحب ضرب الشوم
حلو يا مجلس يا مظبطنا
حلوه الثوره ..زي السكر
حلوه الثوره ...سرقها العسكر